.jpg)
آرمی چیف کی امریکی حکام سے ملاقاتیں۔
بیرون ملک مقیم پاکستانی ملک کے سفیر اور قیمتی اثاثہ، عزت و احترام کی نگاہ سے دیکھتے ہیں : جنرل عاصم منیر
نائب امریکی قومی سلامتی مشیر ، نائب وزیر خارجہ، چیئر مین جوائنٹ چیفس کی ملاقات، مشترکہ مفادات پر اتفاقنیو یارک (مانیٹرنگ ڈیسک) آرمی چیف جنرل سید عاصم منیر نے بطور سپہ سالا را اپنے پہلے دورہ امریکہ کے دوران بیرون ملک مقیم پاکستانیوں سے ملاقات میں انہیں ملک میں سرمایہ کاری کی دعوت دی ہے۔ پاک فوج کے شعبہ تعلقات عامہ (آئی ایس پی آر) کی جانب سے جاری بیان میں کہا گیا ہے کہ آرمی چیف نے اپنے دورہ امریکا کے دوران نائب امریکی قومی سلامتی مشیر جوناتھن فائنز، امریکی نائب وزیر خارجہ وکٹوریہ نولینڈ ، امریکی چیئر مین جوائنٹ چیفس آف اسٹاف جنرل چارلس کیو براؤن سے ملاقات کی جس کے دوران دو طرفہ دلچسپی ، عالمی اور علاقائی سلامتی کے باہمی امور پر تبادلہ خیال کیا گیا۔ آئی ایس پی آرنے کہا کہ ملاقات میں جاری بین الاقوامی تنازعات پر تبادلہ خیال کیا گیا ، آرمی چیف اور امریکی حکام نے دو طرفہ دلچسپی کے امور پر بھی تبادلہ خیال کیا، دونوں اطراف نے مشترکہ مفادات کے حصول کے لیے دو طرفہ تعاون کی کوششیں جاری رکھنے پر اتفاق کیا۔ ترجمان پاک فوج کے مطابق آرمی چیف اور امریکی حکام میں عالمی اور علاقائی امور پر بھی تبادلہ خیال کیا گیا، ملاقاتوں کے دوران انسداد دہشت گردی اور دفاعی تعاون کے شعبوں کو بنیادی اہمیت دی گئی ، فریقین نے باہمی دلچسپی کے امور پر بات چیت جاری رکھنے کے عزم کا اعادہ کیا۔ بیان میں مزید کہا گیا کہ ملاقاتوں کے دوران آرمی چیف نے علاقائی سلامتی کو در پیش چیلنجز پر بات کی اور علاقائی سلامتی کو متاثر کرنے والے پہلوں پر نقطہ نظر کو سمجھنے کی اہمیت پر زور دیا۔ آئی ایس پی آر نے کہا کہ آرمی چیف نے مسئلہ کشمیر اقوام متحدہ کی قراردادوں کے مطابق حل کرنے کی اہمیت کو اجاگر کیا۔ ترجمان پاک فوج کے مطابق آرمی چیف نے بیرون ملک مقیم پاکستانی کمیونٹی کے ارکان سے بھی ملاقات کی، سپہ سالار نے بیرون ملک مقیم پاکستانی کمیونٹی کے مثبت کردار اور کوششوں کو سراہا اور بیرون ملک مقیم پاکستانیوں کو ملک میں سرمایہ کاری کی دعوت دی۔ آئی ایس پی آر کے مطابق آرمی چیف نے کہا کہ پاکستان میں بیرون ملک پاکستانیوں کو انتہائی عزت کی نگاہ سے دیکھا جاتا ہے۔ جنرل عاصم منیر نے کہا کہ بیرون ملک مقیم پاکستانی ملک کے سفیر اور اثاثہ ہیں۔ آئی ایس پی آر نے کہا کہ بیرون ملک مقیم پاکستانی کمیونٹی نے افواج پاکستان کی ملکی خدمات کو سراہا جب کہ آرمی چیف نے بیرون ملک مقیم پاکستانی کمیونٹی کے لیے بہترین خواہشات کا اظہار کیا۔ واضح رہے کہ جنرل عاصم منیر اتوار کو اسلام آباد سے روانہ ہوئے تھے اور 2 دن برطانیہ میں گزارنے کے بعد منگل کی سہ پہر امریکی دار الحکومت پہنچے تھے، برطانیہ میں ان کی مصروفیات کی تفصیلات عام نہیں کی گئی ہیں کیونکہ بظاہر یہ ایک نجی دورہ تھا۔ جنرل عاصم منیر کی قومی سلامتی کے مشیرجیک سلیوان سے بھی ملاقات متوقع ہے، علاوہ ازیں امریکی ایوان اور سینیٹ کے اراکین سے بھی ان کی ملاقات کا امکان ہے۔